Kan hnu zarhpi ni kha kan fale Pastor an ṭuannak anmah Norway mi Baptist Khrihfabu(Kristiansand) ah kan i pum ve. Aa pummi 50 an tling lai lo dah. Laimi pa 5 kan i pum ve i, kanmah he kan tling hnga dek maw? Minung 30 tiang cu ka rel hna nain, kan hnulei a ṭhumi ka rel kho hna lo.
Norway Khrihfabu le Lai Pastor
Hnulei i mer lengmang kha a zoh a chia ka ti. Mino hi pali panga hrawng lawng an si i, tar lawngte an si. Ngakchia pathum li an um ve. Caantlaitu nu nih caan a tlaih bak ve i, Baibal ca a rel hnuah hramthok thla a cam bak ve. Cu khawhin donnak bia tawite a chim i, hla funghnih kan sa. Nu pakhat le pa pakhat nih ṭingṭang tum in hla an kan hruai. Kan dir hna lai ti a um lo. A dir khomi ti zong a um ve lo. Hla kan sak lioah minung pahnih pathum a dirmi an um tawn. A thinlung a cawlcang deuhmi an si rua.
Cu khawhin nu pakhat nih ngakchia pathum li khi lente a hon celhpi hna. Kan ngakchiat lio i ‘’a kuk maw kuk’’a bik maw bik’’ kan rak ti tawnmi phun khi. Sunday School Sayamah le Sunday School a kaimi pawl si dawh an si. Cu dih in tarnu pakhat nih keybord a tum i, pa lawngte tar pathum nih hla fungthum an sak. Hlaremh maw a si, zei bantuk dah timi kaa fiang lo. A ṭhumi zong an sa len ve ko. An tui kho taktak. An aw a ṭha tuk fawn.
Cu khhawhin caantlaitu nu nih phungchimtu a hun sawm i, kan fapa nih phung a chim. Senior Pastor phunphai an ngei lo maw ka ti hna i, amah hi senior pastor a si ko, pastor dang an um lo an ka ti. Phung a chim hlanah caantlaitu nu nih a liangah a tlaih i thla a campiak hmasa(ka uar ngai). Norway holh in a chim caah kei hoi hna cu zei a chim hmanh kaa fiang lo. Nain, phung a chim chungah keimah khuaruah in khua kaa ruat sek len ve ko i, thil pahnih ka thinlung chungah a hon i sermon thlauhmah len ve ko.
A Pakhatnak
Norway kan rak phak kaa hi Laiforum le Runcin chan cu sikaw, ‘’Norway Laimi Genesis’’ timi tlangtar in zarhkhat ah voikhat lengmang ca ka rak ṭial tawn. Cu chungah ‘’kanmah te hna Norway ram kan rak phanh hi Pathian khuakhan a si zia kan fale chanah kan i fiang te lai’’ ka rak timi kha ka lungah ‘’phuut’’ tiah a hong chuak. Culio ah a luan cia kum 2003-2004-2005 lio hrawnghrang i Laimi kan dirhmun le kan sining vialte kha ka mitthlam ah pakhat hnu pakhat in an hong cuang thluahmah. An hong cuang thluahmah ti nakin Video piah in a rak i piah thluahmah ti ninglaw a fiang deuh men lai. Laimi chungin Pastor kan chuak te lai i, Norway Khrihfabu ah anmah holh in phung kan chimh te hna lai timi hi kha lio Laipa aho thluak hmanh ah a rak um bal lai lo dah. Norway Khrihfabu hna ah Laipa nih Pastor ṭuan ko cu thil pipa ngaingai ah kei cu ka ruah.
A Pahnihnak
Ka palh lo ahcun, Norway Khrihfabu ah Pastor a ṭuanmi Laimi kan fale hi minung pathum an um rua. An pathum tein Norway Baibal Sianginn ah ṭhate in Sianginn a kai i, M.A(Master) a dihmi lawngte an si dih. Norway mi nih an Pastor caah Laimi kan fale an laak ko hna i, an hman komi hna hi an lung a rak thiang tuk hringhran hi ta, timi khua a ka ruahter ngaingai. Pastor an lak lai ah Khrihfabu meeting hna an tuah ve lai va sikaw, aho nih dah Laipa thengmang cu Pastor ah agenda a chuahpi hnga i, zei bia le zei bia khi dah an va chim cio hnga? Pastor kawltu committee hna an va ser ve hnga dek maw? Pastor kongah Emercency meeting hna voihnih le voithum in an au ve hnga dek maw? Asiloah, Pastor ṭuan aa timmi Norway mi an va um lo caah a si hnga maw? Baibal degree a hau loh ti i, zumhnak in Pathian rianṭuan aa thawhmi hna an um ve lo caah a si hnga maw timi khua ka ruat ciammam i, phungchim a dih ah ka khuaruahmi a dih deuh rih lo.
Norway ah Lai Khrihfabu bu 15-16 hrawng kan um rua. Khrihfabu pakhat cio milurel in tuak ahcun Norway Khrihfabu le Lai Khrihfabu hi kan i thlau tuk theng lai lo dah. Biakinn a phan le phan loin tuak lebang ahcun Laimi kan tam deuh ving lai. Credit- Perhkalh Thawng
Leave a Reply