Rakhine ramțhen Buthitaung peng, Caungtaung khua ah pasal a ngei cangmi nu pakhat cu AA ralkap pahnih nih an sualpi caah kum 20 thongthlak i voi 30 tuk ding in biachah a si tiah nihin October 20 ah AA nih an thanh.
AA ralkap pahnih cu nu sualpi ruangah kum 20 thongthlak pin ah voi 30 tuk ding in biachah!
Hriamnam i bochan in a inn lila ah an sualpi tiah sualpi a tongmi nu i a chungkhar hna nih AA sin ah taza cuainak an tuah. Cuhnu ah Sualnak a tuahtu ralkap pahnih, sualpi a tongmi chungkhar hna, thil a cannak pawngkam ummi hna le thil sining a hngaltu cheukhat hna cu ni hra chung chekhlatnak an ngeih hna hnu ah an sualnak cu hmuh a si.
Ralkap zulhphung zong an buar, nawlpeknak um lo in zu an ding i nu an sualpi nak zong anmah tein an i phuanțhan nak zong an langter chih.
Cucaah a sualpi tu AA ralkap pahnih hna cu ralkap phunghram he aa tlak in sualpi a tongmi chungkhar hna, khua upa hna le Biaknak lei upa hna hmai ah rianhrang le thong kum 20 pin ah voi 30 tuk ding in bia chah piak an si i voi 30 cu an tuk cang hna tiah theih a si.Credit : CCNN
