Bomb Chuahsualnak In Tamu PDF Ralkap Pathum An Nunnak A Liam
Sagaing ramṭhen, Tamu peng ah SAC ralkap puahhnawh ding in PDF nih hmanhmi bomb cu, mizapi harnak a pek sual hna lai tiin an fimhlawm lio ah bomb a puah caah PDF ralkap pathum an nunnak a liam, tiah theih a si.
Tamu peng PDF pakhat le anmah he ṭangṭi ralkap pahnih cu, December 1 zan ah bomb an fimhlawm lioah a puah caah an nunnak a liam. Kan lung a fak tuk i kan ngaih a chia hringhran ko, tiah People’s Defence Force(Kalay) chungtel pakhat nih a chim.
PDF ralkap pathum chungah pakhat cu sml 10:00 chung tiang hrawng a thaw a taang rih. Siibawi te nih khuaihlainak an tuah hnu December 2 zing sml 4:00 hrawngah a nunnak a liam, tiah Tamu PDF sii ralkap chungtel pakhat nih a chim.
Tamu khua chung lawngah SAC ralkap nih an uk khawh i, a kiangkap khuate hna cu Tamu PDF nih an uk pen dih. PDF nih an nunnak mansung an pek cuahmah bantukin dohthlennak fak deuh in kan tuah a hau, tiah Tamu khuami hna nih an chim.
“Dohthlennak khuallam hi a har tukmi a si. Mizapi nih pumsa duhnak vialte kaltak chung in dohthlennak hi fak piin kan kalpi a hau,” tiah PDF ralkap hringtu a pa nih a chim.
Tamu khua chungah SAC ralkap le PDF kar kahdohnak a zual tuk caah khuami hna i ralrin dingin PDF nih ralrin an pek hna, tiah theih a si. Credit- Thechinpost
Leave a Reply