Breaking News-Hakha Ah Inn A Kaang

Breaking News-Hakha Ah Inn A Kaang

Chin ramkulh, khualipi Hakha Bethanny sang ah Inn pakhat a kaang, tiah theih a si.

Bethanny sang Pu Ceu Kung inn cu nihin December 18 zing sml 9:00 hrawng ah a kaang, tiah theih a si.

Pu Ceu Kung inn pawng a ummi pakhat nih, “Nihin December 18 zing sml 9:15 ah pumh kal ding in kaa tim i cu lioah mei nih a kanghmi haw ka theih caah pawngkam ka zoh cu Pu Ceu Kung a inn a rak si,” tiah The Chin Post ah a chim

Pu Ceu Kung he naihniam in a ummi pakhat nih, “Pu Ceu Kung a inn hi Thang Aw khuami Pu Thang Lian Hmung nih a hlan i anih hi Tungbing khaltu a si,” tiah a chim.

Inn kanghnak pawngkam a ummi pakhat nih, “Zing sml 9:00 hrawng in mei kangh hram aa thawk i inn hlangtu Pu Thang Lian Hmung cu a nupi a va thlah i a ṭin hnuah puai ah rian bawmh ding in a kal ṭhan. Thang Lian Hmung a fa le a nu cu pumh an kal lioah inn a kangh hi a si,” tiah The Chin Post ah a chim.

Meithat zung in meithattu pakhat nih, coka rawlchuannak in mei hi aa thawk i inn hi kaang sehlaw a dawh bik, tiah inn kaangmi an fimhlawm lioah a chim.

Pu Ceu Kung inn cu Pu Thang Lian Hmung nih a hlanmi a si i, 2015 kum lioah an rak sakmi a si. SAC ralkap kuttang palik nih inn hlangtu Pu Thang Lian Hmung le mi pakhat cu biahal kan in duh hna an ti hna i an tlaih hna.

Inn kangh ruangah a thimi le aa hliammi an um lo nain thilri zeihmanh an chuah kho lo a ciam dih ko. Inn kaang cu pawngkam ummi hna le meithattu hna i bawm in an phalh. Cu hnuah SAC ralkap le palik an ra, tiah theih a si.Credit -Thechinpost