Naypyitaw ah Ralbawi pakhat nih Nuchun i ai chiah mi Nu mawtaw in a rial
Naypyitaw Zabyuthirih i Tuhkhahtawwin inn hmun ah ralbawi pensen cia mi nih a nupi chun i ai chiah mi Nu cu kut a thlak hnu ah motor in a rial tiah cu ka hmun i a um mi mipakhat nih a chim.
Hi ralbawipa hi ralkap si nak in Civil ah ilet in pensen a la cang mi Bohmu Pyih Phyo Aung tiah kawhauh mi a si i December 18 zan Sml 12 hrawng ah Tuhkhahtawwin inn hmun i a umter mi a nuchun cu zuu a rit bu in hi tihin a tuah mi a si tiah an chim.
“Thawngpang kan theih ruang ah ka va zoh i Nu cu vawlei ah a rak it. A hramthawk ah cun motor cung cun tum in athongh len,cu hnu ah motor in a rialchap hitluk lawmmam in a tuahto lai ti cu kan zum lo na in motor cu hnutolh ter pah in a rialchih len ko . Mi nih an dan hnu lawng ah a cawlcangh ning cu ngol in mi dang cung ah buaibainak a kawlchap rih, a rii ngai. A tuartu Nu cu kan zaang a fak tuk ko na in ralbawi nupi chun si an uartuk hna,cu bantuk si a duh mi caah zohchun awk a si .Tu inn hmun zong hi Nuchun pawl i chiah nak inn hmun tiah min bunh hmanh a hau deng ” tiah a hmun i mit in a hmu ve tu nih Ayeyarwaddy times ah a chim.
Kum 26 a si mi hi Nu hi Tuhkhahtawwin inn hmun i inn hlan piak mi a si i danlo in a umpi mi a si nak le ralbawi pa nih hin zuurii in a velh theu tawn nak a pawngkam um mi nih an chim.
Tuhkhahtawwin inn hmun hi Naypyitaw i cozah riantuan pawl caah man awl le bikhiahnak he pek le cawk nak ding in an on mi a si na in bawipawl deuh nih cawkchin in an nuchun pawl cu an um ter hna tiah theih a si.
