2023 cu Ralhrang MAH le Anashin vialte Cihmih kum asi tiah NUG le CNF nih an thanh cang. Cuti sikhawh ding ah Khuapi chung ah Raldohnak aum a herh. Kawlram hmunkip ah Raldohnak aa thawk cang lai. Falam Khuachung kahdohnak kha cu INTRO lawng asi rih. Ram lakah siseh, Ramchung ah siseh, Khuapi chung ah siseh, Khuapi leng ah siseh, Raldohnak aum cang lai ti cu a luancia thla 6 lio ah NUG nih an rak thanh diam cang mi asi.
CNA / CDF nih Khuapi chung ah ral an doh caah aa thawk mi asilo. NUG nawlpek nak le Order in Khuapi chung ah siseh, khua lengah siseh, Raldoh cu asi. Vawleipi hngalh in Mipi Cozah kan I ngeihchun te NUG nih an thanh mi asi. Cucu na theih ve lo I na hmuh ve lo ahcun nan hnachet le nan mitcaw asi ko lai. Khuapi chung ah Raldohnak um loin TEINAK lam hi aum ko ti hi NUG CRPH NUCC nih an chuahpi rih lo. Cucaah Khuapi chung Raldohnak kong ah CNA / CDF mawtchiat ding an si lo.
Pau Dohthlennak ah TEITU Si awk ah CNA / CDF lawng a rinh mi kan um bantukin NUG lawng aa hngatchan mi zong kan um rih fawn. MAH te Ralhrang thluk khawh awk ah a herh mi tampi an um mi lakah a herh bik mi le Bawmhchantu thil / minung / bu / phu hi phun 3 an um tiah Mi Fimthiam rual le Raldoh thiam hna nih an ti. Cucu “DIP” ti asi. Mirang holh asi. D – Defensive / Defectors / Defection, I – International Support / International Pressure, P – People Support ti asi.
D cu Raldohnak, I cu Ramdang Bawmhnak, P cu Mipi thazang peknak le Ṭanhpi nak asi. Hi phun thum nih Buaktlak tein le ruang tein bawmhchan a herh mi Pau Dohthlennak asi. Kap thum in kan bawmhchan mi hna aa ruang lo Asiloah Bu khatkhat a thazang a der ahcun RAL TEINAK a har ti asi. Bu khatkhat nih I zukphiar le I Phete a ngah lo mi Pau Dohthlennak asi. CNA / CDF cu alam kip in Bawmhchan in RALTEI awk tlak tiangin a thazang kan ṭhawn ter a herh.
Bawmhchan nak tampi lakah cunglei ah kan langh ter mi phun 3 hi a biapi bik mi an si. Bu khat nih an hlawhtlin lo / aa zukphiar / an Phete ahcun Pingpalo a suk khawh mi kan si. Cucu CNA / CDF sualnak le santlaih lonak asi hrim lo. CNA / CDF Seh awk ah, Innka bak ah Sahrang bangin a bawh mi CHIN Mi le Salai te rual nih, hi hi nan hngalh ah kan duh. Nan lung catlap ah I ṭial uh law na kalnak kip ah I ken cang.
D timi Defectors kong I ruah hmasat usih. Nunnak le thisen sung Biakṭheng ah pekchan / Pekchan cia in, Ralhrang doh lio mi, Phuntungtu Kan Pasalṭha le Nusalṭha hna caah Raldohnak ah hmanrua thilri le riakcaw hi semrel loin kan tuah piak khawh cang hna maw? Tihi Ramchung Ramleng CHINMI vialte nih kan tuak hmasat a herh, kan sum kan I tah hmasat a herh.
Hriam, Kuan le bomb hi duh chung hman awk ah kan rinh khawh cang hna maw? Hriamnam Kuanzen le bomb tbk kan chambau ruang ah RALHRANG Kan tei rih hna lo asi lai maw? Tuak ngai kan herh. Chin Millionaires hi Ramchung ramleng kan tampi ko. Biatak tein nannih nih khuatuak nan herh. Pathian nih Miphun le ram chanchuah awk ah rumnak an pek hna. Kanmah CHIN Mirum nih kan ṭuan khawh tuk mi NUG le midang kan rinh hna caah Ral kan tei rih lo hi asi ko.
NUG zong nih ramdang um CHINMI lawng kan rinh hlah uh, Kan bawmh pah ve uh. Meithal le kuan semrel lo tein hman awk kan ngeih ve nak hnga NUG nih kan bawmh ve rawh uh. Adang cu kan ti lem lo, Meithal, Kuan le Bomb hi azaa lak in pek cu kan duh ko nain, azatawk te tal cu kan bawmh ve rawh uh, Kawlte NUG Federal Army telloin Kum 2 chung Ralhrang doh mi CHINMI kan si ve caah.
NUG nih CDM hi nan zohkhenh lo ka ti bak lo nain, nan thlahphawih deuh hna, Phaisa nan ngeih ruup in nan bawmh mi hna a tlawm deuh. Tam ter dueh uhlaw, CDM tamdeuh bawmh I zuam cang hram uh. Hlan lio cu NUG phaisa a ngeih lo caah kan ngaithiam ko. A poinak aum lo kan ti. Tutan cu USD 100 million leng asi, USD 250 million khonh cuahmah asi.
NDAA zong NUG min in sawk le timhlam cuahmah asi caah, NUG kut ah azatawk budget aum ko ti kha Ngakchia tiang nih hngalh asi. Hlanlio bantukin si ti loin Phaisa ah fel dueh cang uh, mipi bawmhnak vaivuan ti hlah uh, a khah mi hang din duh ti hlah uh. Mipi le ramdang bawmhnak phaisa vaivuan le fir hi Siivai din asi, Techin fapar tiang in tuar ding asi tihi nan hngalh cia mi asi ko. Dohthlennak hnursuan zong asi. I ralrin uh.
“I” Kong I ruah rih usih. Mirang holh in International Pressure / Support ti asi. Pau Dohthlennak ah Ramdang bawmhnak le Ramdang I teltumnak kan ti lai. Kawlram he sipuazi tuah lo: Kawlram in Ramdang Co. Ltd Chuak dih: Rallokap Hriamnam zuarlo: Sualnak ngeih lo Mipi, Ngakchia, Tarnu Tarpa thahnak caah le Innlo le Khuaram hrawk in meiduah nak caah an hman mi, Jet Fighters le Helicopter caah Zinan, Diesel le Petrol ngah loin tuah: SAC ralhrang le an minung hna phihkharh dih, an phaisa chut, an phaisa karh lo ding in tuah:
Crime Against Humanity / War Crimes an si nak / Geneva Convention an buar nak / tbk in MAH, SAC le an minung hna sualnak vialte cu ICC tbk ah Tazacuai I azizut dantatnak tuah ding: tbk hi Ramdang bawmhnak lawng in asi khawh mi asi. Abik in aa hmaithlak I ṭuanvo lak tu cu NUG kan si. Kan hlawhtlin mi aum bantukin kan hlawhtlin lo mi a tam dueh rih. 25% hi kan hlawhtlin kan ti khawh.
ASEAN nih Pau Dohthlennak an kalpi mi Ralhrang MAH nih a zulh duh lo caah kan hlawhtlin khawh lo. UN, USA, EU, UK, G20, G7 tbk le Nitlakram nih MAH cu ASEAN hmang in Pressure pek an duh. Kum 2 chungah ASEAN an hlawhtlin khawh lo. Indonesia Tamada Widodo nih ASEAN Chairman a si tan ah thli aa thlen khawh tiah zumh cio asi. MAH Lungthin hi lung bantukin a hak ter rih ahcun NUG le ASEAN an ṭanṭi men lai. Mipi caah Gospel Thawngṭha bak asi ve lai. Ralhrang kan tei zau ve lai.
International Legitimacy ah NUG a hlawhtlin khawh rihlo. Phung ningin le Upadi ningin cozah a pom mi an um rih lo nain, Ram tampi ah Liaison Office an tuah khawh. S. Korea, Belgium, Australia, USA, UK, Norway, France, Czech Republic, Japan tbk ah NUG Liaison Office tluang tein dirh asi cang. Liaison timi Setsanzi zung siloin Embassy timi Ramdang Vuanci zung onh khawh ding ah NUG nih aa zuam lio asi.
Thazang pek cio hna usih. UN le EU ah NUG nih hmunhma an ngei cang. Credential Committee nih Kawlram UN Palai cu U Kyaw Moe Tun si rih seh an ti. UNSC timi United Nations Security Council nih Mipi le NUG lei ah an um. MAH thluk an I zuam ve. Vanlawng kahnak kong ah No Fly zone ah NUG kan hlawhtlin khawh lo. TEIRIAL rih a herh ko. Thailand le India he NUG hawikom si a herh rih.
Pau Dohthlennak caah Ramdang bawmhnak ah a mak ngai mi cu NDAA (National Defense Authorization Acts, USA Upadi hi asi. EAOs (CNF, KIA, KNU, tbk), CDF / PDF / LDF, CDMer, IDPs, Refugees tbk kha bawmh awk ah minthlir in an tuah mi NDAA bawmhnak asi. NDAA tlaihtu le Tawlrel tu hi USA AID asi lai. (AIDs – Agency of International Development). Cucu Proposal in sawk cio asi lai. NUG Ministry tampi cu Department pungsan ah an thlen I, NDAA bawmhnak cu Proposal ṭial cio asi.
NDAA bawmhnak Nature cu Direct in Phaisa tawmpi pek in bawmhnak asi lo. INGOs, NGOs, LNGOs, CSO, tbk lawng in phaisa pek khawh asi. CNA / CDF dohtu Salai te nih NGOs le CSOs rian cu firnak le rumnak asi an ti nain asi lo, Dinfel nak le Mi harsa le bawmh herh mi chanchuah nak ah biatak tein hmalak mi NGOs le CSOs tu asi. NGOs le SCO ṭuan tikah UN le AIDs Upadi le law kha zulh asi. Anmah HR Policy, Rules and Regulation, Mission, Vision tbk kha zulh asi caah, a fir mi pa cu dantat le azizut asi ko.
Pau Dohthlennak caah Ramdang bawmhnak aum chun mi le a tam bak fawn mi cu: NDAA bawmhnak asi. INGO, NGO, CSO, tbk le NUG in bawmh kan si ahcun kan si ah a phan mi a tlawm deuh ve lai. Zeitintiah Bawmhnak caah Palai asimi INGOs, NGO, LNOGs, CSO, nih Admission / Administration fee caah 30% tiang hman khawh asi.
Mipi, CDMers, IDPs, Refugees, CDF, CNA sinah direct in Phaisa phan seh law, bawmhnak tam dueh seh ti kan duh ahcun, Kanmah tein NGO, LNGOs, CSO, tbk dirh cio ding asi. Phaisa pek tu nih anmah le Bawmhmi karlak ah Channel le Palai tampi um kha an duh lo. UN Agencies hna hi an hlawhman le thiam man an sang I an tam tuk, Benefit, Insurance tbk a tam tuk caah, UNDP cu Direct Implementer ah an ngawl ter mi kha asi.
NDAA bawmhnak hmuh awk ah a herh mi Documents, Human Resources Policy, Rules and regulations, Vision, Mission tbk kha tling tein nan tuah cia lai. Nan thiam lo ahcun a thiam mi Phu le Pumpak kha I sawm in tuah ding asi lai. Cucaah Mah le nainiam mi le khuaram cio in / Pengtlang cio in CSOs hi dirh cio ah cun NDAA bawmhnak hi tampi kan hmuh ve lai. INGOs, NGOs, LNGOs, NUG tbk ah a pek dih theng hna lailo.
NDAA cu USAAIDs kut ah ap cang kan ti kha. NDAA bawmhnak a hmuh hmasa ding hna cu HR Policy le Financial Management Policy, Risk Management Policy, Anti Fraud / Anticorruption Policy a ngeih mi hna kha papek an si lai. Hi kan langhter mi Policy ah kan hlawhtlin cio ahcun: Hlawh tlawm dueh a la mi le Mipi / CDMers / CDF / CNA kut ah phaisa tampi a phak ter khawh ding mi kha papek asi lai, Fraud le Corruption aum ter lo dingmi le Risk Management an tei lai timi Bu kha papek asi lai.
CDM, CDF nih mah tein NGO caah bu dirh le policy tuah cia, Proposal tuah kha kan thiam lo ahcun a thiammi I sawm hna uh, an thiam mi nan hmuh khawh lo ahcun CHRO kuttang in sawk nak tuah le bu dirh I zuam uh, CHRO nih an pass hna ahcun NDAA phaisa hmuh hi a har lo.
Cutin nan duh lo ahcun Kan ram ah aum cia mi INGOs, NGOs, LNGOs, CSOs tbk he I bawmh in sawk te uh. NUG le NLD Upa hna nih NLD minung cu sawk nak catlap an pek hna I an sawk ter hna tiah thawngpang a leng. A poinak aum lo. Adang zong nih mah tein apply tuah khawh asi. USAAIDs Website ah lut zungzal uh.
P timi mipi thazang peknak, bawmhnak le ṭanhpi nak kong I ruah tuah usih, Mipi bawmhnak le ṭanhpi nak hi 100% asi ko ti khawh asi. EAOs le Tlangcungmi nih Kum 70 Dohthlennak kan hlawhtlin lo mi cu Mipi nih za ah za kan ṭanhpi hna lo caah asi. Pau Dohthlennak ah mipi ṭanhpi nak hi hlan lio ah aum ballo I hmai lei zong ah aum ti lailo. Cucaah tutan hi MAH te Ralhrang kan tei hna lo ahcun hmai lei kan tei lai ti cu zumh a har ngai cang.
Mipi nih Voi hnih tiang thazang pek in an kan ṭanhpi lai ti khawh asi ti lo. Ral kan tei lailo titu Salai te hi cu Mipi thazang kha an hmuh fiang lo caah asi. Democracy Dohthlennak ah Mipi ṭanhpi nak in a hlawhtlin lomi an um rih lo. Prophet Elisha Saalpa Gahezi nih Vancungmi ralkap relcawk lo kha ahmuh khawh lo caah Syria ral a ṭih bantuk khan Salai te kawi rual hi an si. Ramkhel le Democracy ah an mit a caw I an hnachet mi Salai te an si ko lo ma!
Pathian minung, Prophet Elisha cu anmah lawng in Syria ral a do. Prophet Elijah zong amah lawng tein Baal Prophet 450 he an I do. Pathian minung cio cio ah kan I lawh hna lo mi hi apoi cem mi cu asi. Israel Prophet Elisha le Elijah cu anmah pumpak bakin Ral an do. Kannih Maurop Pastorte le Evan hna cu Raldohnak caah Krifa phaisa hmang hlah uh kan ti rih. Mah pumpak in Ralrhang doh cu chimh hlah, Pau Dohthlennak ah bawmhtu CBCUSA cu Satan nan si an hei ti rih, TEINAK kan hmuh tikah hmunhma an ngeih te hnga maw, kha bantuk Rev le Dr te kha.
KRIFA bu le KRI mission caah ral kan doh chih timi an fiang khawh bak ve loh. Politic le Pathian he kemh in raldoh tu Moses, Joshua, Israel tbk hi an I philh ter. Mitcaw le hnachet phunkhat an si ve ko. Biathlam ṭialtu John The Baptist nih HNA ngeih mi nih theih uhlaw, Lungthin a ngeih mi nih hngalh uh a ti mi kha, hngalh in a theih khawh bak lomi Rev / Dr /Evan te an si ko lo ma.
Krifa an thah hna, an hrem hna, thong an thlak hna, Pathian Biakinn mei an duah, an hrawk, Biakinn chung ah duh poah in an um I, Pathian he a ralchanh mi thil thurhnawmh lawng te a tuah mi Kawl Ralhrang Rallokap dohnak ah ziah KRIFA bu phaisa kan hmang lailo, Rev le Dr. Evan te hmanh Meithal I tlaih phu asi hi aw!
MAH te SAC ralhrang nih 2023 thimhnak tuah an I timh. 2023 thimhnak an tuah khawh ahcun Pau Dohthlennak hi sullam ngeih lo bantukin aa chuaksiam khawh men. Mipi kan thlafim ngai a herh. Rulbang fim in Ṭhuro bang nunnem a herh lemlo. Kawlte hi Rulbang nan fimzer ko nain Ṭhuro bang an nunnem lo.
Rallokap hi an zual khun. Annih cu Rulbang an zertiam, an fim I Sahrang bang Tlangcungmi sehtu an si. Rul hmanh ah Rulpuar, Sahrang ah Zangfahnak pelte hmanh a ngeih lomi Chiandeih le Mikei an si. Namhchan in le hramhram in vote (mee) an I thlak ter hna ahcun hitihin rak tuah uh. U Nu Democracy chan ah Thansin Pasapala (U Nu Hohak mi) le Ṭimee Pasapala an um.
Ṭimee phu hi Uk Sang he Socialist Party a rak dir Ṭi mi Bashwe le Kyaw Nyein te hruai mi asi. Ni Vung he Phukhat an si. Voikhat nak Ni Vung Uknak a rak lak ter mi kha anmah an si. Ṭimee Pasapala cu Ralkap le Ralhrang Ni Vung nih an bawmh mi an si. Thakhin Soe le Thakhin Than Tun Hruaimi Communist Party zong 1956 thimhnak cu an I zuam ve rih. Ni Vung le Ralkap nih Ṭimee vote ding ah an fial hna.
Mee (Vote) thlaknak hmun an phak tikah Mipi nih Thansin Pasapala an vote dih. Rallokap le a Lalang rual (non CDMers) telin hramhram in vote an I thlak ter hna, Vote pek lo ah mah nunnak him lo tiang dirhmun kan phan / phak sual ahcun, Yes (AMEN) rak ti ko uh law, Vote pek nak hmun nan phan belte ah Hnawm mi mee (rel awk tlak lo mi) ah rak tuah dih ko uh. Nan VOTE cu rel awk an ṭha ti lai lo I ceih hna seh.
Pau Dohthlennak ah a ho phu dah CHINLAND min in hruaitu le kuri tu an si ti hi hngalh dih mi asi. Raldoh lio ah CHINLAND A hruai tu le a hruai khawh tu phu le Ralkap hnu zulh kha kan rian cu asi. Ral teinak zong asi. CHIN lungrualnak le pumkhat sinak zong asi. CHINLAND hruaitu ah upa le lutlai I cuh can asi rih lo. Ral kan tei hnu, kan ram le miphun a zalon hnu ah nang cu Uktu Luban na si te ko lai hen cu, tu tein Uktu luban le hruaitu cu si kan duh ve hnga, a poi tak khi asi ko.
Kum 33 leng CHINLAND zalonnak le Zalennak caah, Chinram le chin miphun damnak caah Dohthlennak a tuah tu phu nih Pau Dohthlennak ah an kan hruai cu adik mi asi. Pathian hnatlak nak zong asi. Kum 2 te lawng asi rih mi hriamtlai phu nih kum 33 leng a upa cang mi Miphun ralkap kan zuam cawh mi hi, Ral teinak asi lo. Ralsungh nak asi.
Israel mi Sim ramcar ah Moses nih a hruai hna lio ah (raldohnak in can an hman lio) Moses dohtu hna kha Canaan ram a lut mi an um lo. Pathian nih dantat mi an si. Pathian nih an caah a thimh piak mi Moses, Joshua le Galeb te a cohlan tu Israel mi lawng Canaan ram ah an lut khawh. Dohtu an um hi Adik mi le deu kan um tinak asi. Adeu cu can rau lo te ah an tlau I a dik mi cu chansau a nguh I tuanbia ah aa cang lan ko.
Pau Dohthlennak ah Kan miphun ralkap hna cu Dohtu le zuamcawhtu tampi an ngeih mi hi a dik mi phu le ralkap an si nak a langh ter tu an si. Thachiat ding kan si lo. Israel mi tuanbia kan zoh tikah, Pathian thimhmi Hruaitu le an Ralkap dohtu hna cu an vaivuan I an tlau nak hmanh hngalh an silo. Canaan ram ah an lut ve fawn lo. Ralhrang MAH kan thluk I teinak kan hmuh tikah, kan ram le miphun a dam te tikah, CHINLAND Ralkapbu le Hruaitu dohtu hna hi kan hmuh khawh ti hna lo men ko.
Ralhrang kan ti mi Tuluk Mao Zedong, Lenin, Cuba Gastro, Taliban, Vietnam Communist, Khmer Dohthlennak hruaitu Pol Pot Cambodia mipi million in thattu, tbk hna hi mipi nih za ah za (80% – 100%) an ṭanh pi hna caah teinak an hmuh. Ralhrang Hitler kha Germany mipi nih an uar tuk I an ṭanhpi.
Ralhrang Joseph Stalin zong mipi nih an uar I an ṭanh pi caah WWII a tei. Pau Dohthlennak cu Mipi nih za ah za ṭanh pi mi asi. Chin Mi belte nih CHINLAND Ralkapbu le an fa le CDF cu za ah za kan ṭanh pi hna lo, hihi saal lungput le mi tenau sinak asi. Mi nauta sinak le Saal sinak kha mah tein I thimh asi ti hi ruah awk le a tuak awk kan hngalh tawn lo. Chinland Ralkapbu ah aa fonh khawh lomi cu CHIN nan si lo caah asi lai.
CNA le CDF hi pumkhat ansi ko. Nu le va cu pahnih kan si nain pumkhat kan si bantuk asi. Thumkomh Pathian (Trinity) bantukin Pumkhat asi mi CNA le CDF an si. Buai awk a um lo. A buai mi hna hi Oneness Theology bangin pumkhat kan si ter duh hna caah asi.
Pathian hmanh cu dakaw Pa Fa Thiangthlarau pa 3 fonh ah pa 1 asi cu. Oneness Theory in pumkhat sinak cu Ral kan tei tikah, Chin Federal Army ah pei kan siam lai cu. ZRA le zemlo te phu 3 hna khi cu buaipi ti hlah usih. Kan zeizong in CHINLAND Ralkap ṭhawn ter sihuh. Crd: Saya H. Rung Kaw
Leave a Reply