Ralhrang Nih Chinmi Pahnih (2) An Thah Hna



SAC Ralkap Nih Matupi Peng Ah Tualchung Mi 2 An Thah Hna: Chin ramkulh, Matupi peng ,CDF- Matupi camp pakhat umnak Ngalai khua cu january 15 ah SAC ralkap nih thazang tampi in an luhhnawh i khuachung mi 2 an tlaih hna i thi lak in an hrem hna tiah CDF- Matupi chimphuannak nawl ngei Aron nih a chim, Cheukhat media nih khuami 6 an thah hna tiah an langhter nain Aron nihcun Pu Lap Lian le Pu Van Bik lawng an si tiah a chim.

Pu Lap Lian hi Mizoram ah ralzam mi a si i Ngalai khua ah a van tlun ta karlak te a si, ram le miphun caah a nunnak liam mi CDF- Matupi ralkap pakhat he mei in an khangh ți hna, Pu Van Bik tu cu a liang an leh buin a țang ah meithal in an kahnak le a hngawng an ahnak liam he thlanmual ah a ruak hmuh a si tiah a chim chap.

CDF- Matupi nih ngalai khua cu a lak(control ) khawh țhan cang, Ngalai khua hi Nikum,2022 lio zong ah SAC ralkap nih khuami 9 an rak thah hna caah khuapi in an khua an rak chuahtak bal cang.

CDF -Matupi nih January thlakhat chung ah SAC 18 kan fimhlawm hna i Tualchung mi 2 le kan ralkap 1 an nunnak a liam ve, Matupi in Hakha, Mindat, Paletwa le Bualra kalnak gate hngaktu SAC ralkap kan kah lengmang hna caah khualtlawn duh mi nih CDF Matupi sin ah theihter hmasa ding in cathanh zong an chuah. The chin post



Source link

Be the first to comment

Leave a Reply

Your email address will not be published.


*