Kawlram Cu Kum Thum Chungah Singapore Tluk In Ka Ser Lai

Min Aung Hlaing: Kum thum chung ah Kawlram cu Singapore tluk ding in kan sersiam lai.

Myanmar ram uknak a firtu Min Aung Hlaing nihcun kum thum chung te lawng ralkap nih can kan ngeih caah hin mahhi kan can chung te ah Kawlram cu Singapore tluk kho ding in kan sersiam lai tiah meeting ah a chim.

Cu pinah Nay Pyi Taw ahhin vawlei tang Tlanglong lam le electric hman mi Bus hna kan kalter hna lai tiah Min Aung Hlaing nihcun a chim chap.

Ralkap nih uknak an lak hnu ah Kawlram pi cu khuate in khuapi tiang buainak in a khat cang i ramchung mipi rian loin an um cio hna.

Cu chinchap ah Kawlram pi cu covid zawtnak nih fak tuk in arak kan den hoi caah minung tampi nunnak a liam pinah minung tampi kan zaw hna.

Covid ruang ah minung tampi rian kho loin kan um hna i Kawlram pi cu sifak nih a kan chilh dih cang. UN nih a ruahdamh ning ahcun tu kum chung ah Kawlram mipi 35 million hrawng hi din ei harsa taktak in an um lai tiah a chim.

Hi bantuk can lio ah Min Aung Hlaing nih Kawlram cu tu hnu kum thum chung ah Singapore tluk ding in kan sersiam lai i Nay Pyi Taw khuapi ahcun vawlei tang tlanglong lam hna le Electric hmanmi Bus hna kan kalter cang lai a timi cu ruah ahhin ngaihchia a si ko.

Pu Than Shwe nih Kawlram phaisa vialte in Nay Pyi Taw a rak sersiam bantuk khan Min Aung Hlaing nihhin a thar in Nay Pyi Taw rumro sersiam a timh than ko cang timi a lang.

Pu Than Shwe nih khan Kawlram phaisa vialte hmang in Nay Pyi Taw cu kum tampi chung a rak sersiam. Nay Pyi Taw Motor lam a that ning le sizung a that ning pawl chim awk a tha lo. Nay Pyi Taw i bawlung chuihnak  certual hmanh hi nitlak lei ram pawl hmanmi tluk in a tha ti a si.

Cu bantuk phun in Min Aung Hlaing nihcun a mah le ralkap bawi pawl himnak ding caah Kawlram phaisa hi Nay Pyi Taw lawng te ah hman a timh ko cang rua.