THAILAND AH TLAIHMI KAWLRAM MI MINUNG 700 RAWL AN EI DUH LO

Zangfahza Thailand ih Khummi Myanmar Pawl. Thailand palik pawl ih kaihmi Myanmarmi 700 hrawng cun Myanmar ih kuattlun an si theinak dingah ni 3 sung rawl an ei duh nawn lo zo.Kaihmi 700 lenglo cu Thailand palik pawlin an kaih hnuah daan vekin an tlun thuhla relfel thluh zo a sinan, Myanmar ih kuat tlun an silo tikah rawl ul in duhphorhnak nei an si.

Myanmar ih an kuat tlung hrih lomi pawl cu mimalte tlemnak hmunah mi tampi an retkhawm ih harsa zetin an um. Thailand palik pawl cun thubuai nei nawn lo, thlah zalen zomi cu hmunkhat ah an khum hrihmi a si ih, an tlunnak dingah anmai sumpai an phut. Cutikah mahte tlunnak ding nei loin an hrantang. An tlun thei hrih lo ruangah Lah-wah kah zung ah khum a si ih, thla 8 tiang um zo khal an um.

An lakah kum 60 kiangkap khal an um ih, naupai, harhdamnak tha lo le nunau tamzet khal an tel. Mipum 50 hrawng tlem ah mipum 150 hrawng ret an si.A hmunih um pakhat cun “Room fate ih mi tamtuk ret kan si tikah ihnak khal a um lo. a tet aw theithei an it. Einak a um lo ih, ihnak khal a um lo. Rawl thaten in pe lo ih, an inn vulhmi ui rawl an pekzat hman in pe lo.

Kum upa an um, naupai an um ih, hitin kan um ringring thei lo ding. Damlo an um asikhalle tuamhlawm an si lo. Kan lakah zengnat nei khal an um.Nunau hrangah a buaithlak sinsin. Thatin an neihmi daan khal thaten an tuamhlawm aw thei lo. Thawnginn in luat zo kan si ih, thubuai khal kan nei nawn lo. Inn tlung ding kan si ruangah khum kan si tikah kan tlun caan khal a kim tuk zo,” tin a sim.

Hivekin Myanmar mipawl an hrantannak san cu Thailand lamin an kuat thei tuk nan, Myanmar lamin Thailand ih kuatzat an cohlan thei lo ruangah taang an si tin simtu an um. Thailand lamin kuat rero khal sehla Myanmar lamin thlakhat ah veihnih lawng an rak cohlang tin an sim.

Buaipitu pakhat cun “Kawhtuang lamin an pom lo ruangah hivek kan si. Myanmar lamin rak pom haisehla an tlung thei tuk ding. Myanmar an thlen tikah covid 19 ruangah khum an sile cemliam ziangkim nanmahten nan tum aw thluh ding an tibet. Myanmar mi an si ih, ziangruangah an pom duh lo cu a mak tuk lawlaw,” tin a sim.

Hrantang Myanmarmi lakin sumpai pe theithei an tlungter hmaisa ih mi pakhat ah Thai baht thawng 10 an dil tin an sim. Sumpai pek ding nei lo cu tlung thei loin an um ih, cumi ruangah rawl ei duh loin duhphorhnak an nei. Duhphorhnak an neih tikah sunglam in sangka an khar thluh. A san cu Thailand palik pawlih hnaihnok an tih ruangah tin an sim.

A sungih um pakhat cun “Rinsanmi pawlkom pakhat khat an rat tikah sangka kan on ding.Culo ahcun sangka on kan tum lo. Ziangahtile , a kiangah Thai ralkap 50 hrawng an um zo ih, sangka kan ong pang a si ahcun a phunphun;n in dekcok ding. Anmah Thailand thuneitu lam cun rawl kan lo pe ding sangka ong uh in ti rero nan, kan duh lo. Ni 7 tiang cu kan daih ka zum lo ih mi tampi kan thih phah ko ding.

Curuangah, rinsanmi pawlkom pawl ra dingi kan dil duh. Thailand thuneitu pawl lawng duhphorhnak kan tuahmi a silo ih ,Myanmar lam tuanvo neitu pawl khal kan sawmnak a sisawn. Myanmar Embassy khalin rak thei haiseh. In runsuah hlanhlo cu rawl kan ei lo ding, kan thih thluh khalle a poi lo ,” tin a sim. Credit: Vapual Auaw