Mah hi Min Aung Hlaing Caah Thawngpang Chia A Si

SAC Nih ASEAN Biahrennak A Zulh Lo Ahcun Mithmai Zoh Loin Ṭuanvo Kan Laak Cang Lai — Indonesia President. ASEAN biahrennak 5 cung ah Indonesia cu zulhphung ning tein kan kal lai i, Myanmar ram buaibainak vialte hi ASEAN cung ah Myanmar nih a khinh lai ding cu kan cohlang kho lai lo. ASEAN biahrennak 5 an zulh lo ahcun mithmai zoh loin ṭuanvo kan laak cang lai, tiah SAC nih nawlngeihnak an laak kum 2 tlin camtuak ah Indonesia President Joko Widodo nih a chim.

Cu pin ah Myanmar ram ah a ran khawh chung in ralbawi, General pakhat kan thlah lai. Anih hi Indonesia ram siamremhnak ah a rak i tel vemi a si, tiah Indonesia President nih cun a chim.Myanmar ram ah va tlun hnawhchan biknak a ruang cu; Indonesia ram hi zeitindah Democracy ram kan rak ser i zeitluk in dah kan rak cawlcangh timi va chimh-ruah ding ah ralbawi pakhat thlah kan timh hi a si, tiah Indonesia President nih cun Reuters ah a chim.

Indonesia President nih ASEAN biahrennak 5 hi SAC nih an zulh lo ahcun mithmai zoh loin ṭuanvo kan laak lai tiin a chim ko nain zeibantuk ṭuanvo laak ding kong tu cu a chimfianhnak a tuah lo.Cu pin ah Myanmar ram ah ralbawi pakhat thlah ding in a chimmi kong zong ah ralbawipa a min cu a langhter lo, tiah theih a si. Credit: The Chin Post

Relchap/.SAC Ralkap Ca ah Vanlawng Datsi A Zuarhtu Company Hna Cu UK Nih Phihkhamnak An Tuah Hna. SAC ralkap nih vanlawng hmangin ramchung lila ah tualchung mi hna cu bomb in an thlakhnawh hna caah SAC ralkap vanlawng datsi a zuarhtu Company hna cu UK nih phihkhamnak a tuah hna, tiah theih a si.

Trading Company Limited Le COMMODITIES CONNECTION Company Limited nih SAC ralkap vanlawng ca ah datsi an zuarh tawn hna i cu company cu UK cozah nih phihkhamnak an tuah hna, tiah British Embassy Yangon nih a ṭial.UK cozah lutlai pakhat James Cleverly nih cun, “SAC ralkap vanlawng datsi a zuarhtu Company hna phihkhamnak kan tuahmi hna hi an tangka luhnak le hriamna hrampi luhnak a zorchukter deuh hrimhrim lai,” tiah a chim.

Anmah a dohtu pohpoh cu zohchia tuk in an thah hna pinah vanlawng in kahdohnak an tuah. Nuhrin covo tamtuk an buar caah an sual man cu an in hrimhrim a hau, tiah James Cleverly nih cun a chim.