Ngaihchiatnak thawng, CDF Pasaltha Thang Uk nih ram le miphun caah a nunnak a pek. CDF Matupi ralkap chungin pasaltha Thang Uk cu nizan February ni 4 ah ralram hmun pakhat ah bomb i chuahsualnak in a nunnak a liam tiah theih a si. Hi konghe pehtlaiin CDF Matupi zong nih an ngaihchiatnak an langhter.
Thawngpang dang.Paletwa Peng Ah Kahdohnak Voi 5 A Chuak, SAC Ralkap 16 An Thi. 2023, January thla khat chung ah Chin ramkulh, Paletwa peng CDF-Paletwa battalion 2 hmunhma ah SAC ralkap le CJDC – Special Force, CDF- Paletwa, CNA kar kahdohnak voi 5 a chuak, cu kahdohnak chung ah cun SAC ralkap 16 an thi, hliamhma tuar an tam tiah theih a si.
SAC ralkap an thlahmi hriam ruang ah sualnak ngei lo tualchung mi pakhat a nunnak a liam tiah theih a si.Kahdohnak chung ah CDF-Paletwa nih MA-1 pakhat an laak khawh, mipi lei ralkap 2 nih hliamhma fak an tuar. Kahdoh a chuahnak hmunhma ah SAC ralkap nih an duh tik caan paoh ah rallam sial in kahdohnak an tuah khawh caah mizapi nih ralringte um cio ding in CDF-Paletwa nih February ni 4 ah cathanh an chuah.
Thawngpang dang. A fa thla 7 lawng a simi cu hringtu a nu nih mual a liamtak. Pi Lal Hmun Siam i cu TB zawtnak ruangah Greenwood Sizung ah nizan February ni 4 suimilam 3am ah hi vawlei nunnak in mual a liam tiah theih a si. A thih ah hin a fanute thla 7 lawng a si rih. Pi Lal Hmun Siam hi va a ngei cang mi a si.
Asinain va a ngaih ah man an i pek dih lo caah a ruak zong an khua Vanbawng ah lak a si tiah theih a si. Asinain a fanu te hi Typhoih le zawtnak dangdang ruangah angandamnak a tha lo i, a nu ruak an kalpinak hmun ah kalpi khawh a si lo caah a pi sin ah an chiah chung tiah theih a si.
A nunnak a liammi cu Pi Lal Hmun Siam ruak cu khua deipi a si i, Nihin suimilam 12 ah an vui lai. A kaltak mi a fanute thla 7 te hnuk thlei zong a za rih lomi a si pin ah nu dawtnak zong dong manh loin a nu nih hi vawlei nunnak in a kaltak. Pathian nih umpi in lam hruai zungkal ko seh.
Cabia dang.Ka nulepa umnak inn ni 2 ka hrial tawn. Kei hi dohthlennak he pehtlaih in ca ka tial poah ah ka nulepa an umnak inn ah ni hnih hrawng tin loin ka um tawn. Ka tin sual ahcun ‘hi ca na tial ah zeidah a kan thahnem? Huat nai huahmi le thah ding thihphaih na ton lengmang mi lawng ai chap ko lo maw?
Thinphang le ih nuam loin na kan tuah lengmang. Na kan daw rua lo. Voi zeizat dah dai tein um ko law tiah kan in chimh lai?’ tiin an ka sik tawn caah ka lung ai nuam ve lo i ni 2 tal ka hrial tawn hna cu asi.A hlei in, ka nu khi lungthin zawtnak a ngeimi a si. Lungretheih nak a um poah ah rawl a ei duh ti lo, ai hngilh kho lo. Kei ca ka tial ah a zawtnak a zual deuh tawn.
Ca ka tial poah ah keimah pumpak lei kap in thahnemnak pelte hmanh a um bal lo, sunghnak lawngte a si timi cu ka tial hlan ah 100% ka pemh cia ko.Asi nain, ka unau hna nih tiva pakhat tan an timh, a thuk tuk, aho tal hmanh tiva ral an phan kho lai lo, tuan ah an kir lo ahcun an pam dih lai timi fiang tein ka hmuh khawh. A thuk ngai timi cu ka unau hna nih an thei lo, cu tiva ah ruak kawl in paw ai cawmmi tam deuh nih cun ‘a thuk lo, fawi tein nan tan khawh lai’ tiah an hlen hna.
Ruak kawl awk tam deuh seh, phaisa tam deuh lut seh ti an duh caah a si. Cheukhat belte nih cun a thuk lo tiah an zumh taktak ve ruang ah dawtnak lungthin he tan ding thazaang an pek ve hna. Cu tiva an tan ahcun an thi dih lai i tiva khuachia an hrang chin lai caah kan khua ram zong muihnak lei a panh chin lai timi kai fian tuk ko buin phuan loin dai tein hmur cip ding khi kai sum kho tawn lo, kai sum ah khin ka lungthin a baa tuk.
A thi ding khamhnak caan tha na ngei nain na khamh duh hna lo, kan khua ram a rawh cikcek nak hnga lo biadik na theih ko nain a caan a tlai tuk hlan ah na chim lai lo maw? Na miphun maw na dawt deuh lai, nangmah pumpak dah?’ timi ruahnak nih um thiam loin aka tuah. Hi ruang ah sunghnak a ngan tuk ko buin ka miphun le ka unau hna caah ka siaherhnak ka tial tawn hi a si.
Saya Van Ram Uk, Saya Tial Lian Thang le Saya David Lah hna nih nikum lei ah khan an siaherhnak an langhter bal ve. Fak tuk in doh an tong i an dai. Saya James Vannei Lian le Saya Rual Uk zong nih tlawmpal an chim ve. Ruahnak a bi deuhmi nih cun mihrut ah nan ruah men ko hna lai, nain tulio kan dirhmun ah cun mah pumpak nakin miphun le ram adaw kho deuhmi pasaltha lawng nih khi bantuk biadik khi an chim ngammi a si.
Leave a Reply