Hawikom ttha, Lungthiang, tangdor nun anei mi CHRO rianttuan kan rak thok ka ah thil kan rak thei lo. Chinmi kan sining vawlei theih in kan aupi lai ti kha kan itinh mi pakhat ah aitel. Achim cu a fawi na in vun ttuan taktak ah cun a har ngaingai mi asi.
Kan lungfah nak le kan duhnak ruang ah kan rak I awt ngam ve sawhsawh bia khi arak si. Hi rian kan rak I awt hnu ah ka ruah lo nak hmun ah ka ruah lo mi sin in thil ttha tampi ka hmuh ka ton lengmang.
Pathian nih hawikom ttha tampi a kan pek. Kan hawikom hna hi mi fimthiam, thil tikho an si hna na in tangdor le mi zawnruahnak nun a nei taktak mi lawngte an si. Ka hawikawm tampi hi Kharihfa theng an si lem lo.
Tutan Washington DC ka kal ah ka hawikawm (tiah hei ti ko ning) CHRO kan rak dirhka te in nihin ni tiang ah a kan ttanpi zungzawl tu Brian a office ah ka va leng. Aluancia kum 20 renglo CHRO kan rak thok ka ah National Endowment for Democracy NED ah Burma ram kong a tlai tu a rak si. Atu ah cun Asia ram vialte tlaitu rian ngan pi a ttuan cang.
NED cu US Cozah State Department le Congress hnatlak nak in vawlei pumpi ah Democracy le Human Rights a len khawh nak ding ah rian a tuan tu bu ngan pi an si. Hi ka hawipa Brian hi Bawi le rian ngan pi a tlai cang mi asi na in ka va len tik ah hawikom tthing khu le phak in bia kan iruah I zanlei mui tiang a zung khan ah cun kan tthu I can liam kan thei manh lo. Kan ram thil sining, kan hawi le pawl zeidah an tuah cio cang,, Burma ram political thlihran, Chin ram thil si ning pawl kha cawh hrup in kan ceih i kan bia adong kho lo.
A vun muih pah cang caah ka hei ttin lai ka ti I, a cazi (a pumpak bawmtu) pa nih kan hngak ko hna nan biaruah a thaw tuk hman thlak ta hna nan duh maw tiah a kan ti I duh rilmal dah he tiah hman kan ithla ta.
Pathian sin in thluachuah ka co mi tampi lak ah ka hawi le pawl hi mi fimthiam, riansang a ttuan mi an si ko bu zong ah tangdor te le mi zawnruah nak he rian dingfel te in a ttuan mi an si mi hi asung lawi taktak mi asi. Credit-Salai Bawi Lian Mang
Leave a Reply