TLAMTLING HRAM SEH, AN I ZUAM CUAHMAH CANG

Chin Ramkulh Peng Cheukhat Le Hmun Dang Tampi Ah SAC Nih Phone Line An Phihmi Hman Ṭhan Khawh Ding In Kan I Zuam: NUG. SAC nih internet line an phihnak peng 15 ah internet hman ṭhan khawh ding in kan i zuam cuahmah, tiah NUG Communication, Ministry Of Information And Technology Minister Htin Lin Aung nih nizan February ni 5 ah tuahmi NUG Global Town Hall ah a chim.

NUG ukhruainak hma a kal khawhnak ding le fimcawnnak lei kan ṭhancho khawhnak ding zong fak piin kan i zuam cuahmah, tiah NUG Communication, Ministry Of Information And Technology Minister Htin Lin Aung nih cun a chim.

Cu pin ah SAC nih Sagaing ramṭhen le Chin ramkulh peng 20 leng ah internet line an phih dih, tiah theih a si.Chin ramkulh, Mindat peng, Matupi peng le Kanpetlet peng ah SAC nih internet line an phihnak kum 2 leng a si cang i phone line zong an phih dih, tiah theih a si. TCP

Relchap a dang, KIO Chairman: SAC Nih Remdaihnak An Sermi Zumh Awk Tlak Pakhat Hmanh A Um Lo. SAC nih remdaihnak an sermi lamthluan hi pakhat hmanh zumh awk a tlakmi a um lo, tiah KIO Chairman General N’Ban La nih nizan February ni 5 ah a chim.

KIO an dohthlennak kum 62 tlin camtuak ca ah General N’Ban La bia cu caan karlak Chairman General Kam Shawng nih a chim, tiah theih a si.SAC le tlangcung hriamtlai kar remdaihnak ser hi tlangcung hriamtlai hna cu ramri hngaktu ralkap ah thlen, an hriamnam chuh le tlangcungmi hna hrem le namneh timh duh ah a si ko, tiah a chim.

KIO cu NUG, PDF hna he pehtlaihnak ṭha tein kan ngei i ramkhel umtuning hoih in rian kan ṭuan ko nain kawl miphun hna nih ramkhel an hmuh ning aa thlengmi a um rih lo. Kawl miphun hna nih miphun tam -u uknak lungthin an ngeih peng ko ahcun hramhram uknak dohthlenak hi caan sau a rau kho, tiah General N’Ban La nih a chim.

KIO cu Kachin ramkulh, Shan ramkulh chaklei le Sagaing ramṭhen cheukhat ah PDF he i bawm in ralkap kan doh cuahmah. SAC nih nawlngeihnak an laak hnu in ralkap le KIO kar ah kahdohnak voi 1,125 a chuak, tiah Colonel Baw Bu nih a chim.