NUG NIH THAWNG AN VUN THANH CU CELH DING BAK SI LO

Thlakhat chung ah mipi 100 leng an thah hna tiah NUG nih a thanh. January thla chung ah mipi 116 thah an tong i peng le ramṭhen 7 ah mipi inn 5,000 leng an khangh tiah NUG nih a thanh.Pa 78, nu 24, phungki le biaknak lei rianṭuantu 4, hngakchia 10 tiah an zapi 116 an thah hna tiah cathanh ah an langhter.

Mipi 100 leng SAC ralkap kut in an thi tiah NUG nih a chim.Thah a tong mi hna hi Sagaing ramṭhen ah minung 80, Mandalay ramṭhen ah minung 11, Magway ramṭhen ah minung 8 tiah a tambik an si. Thah a tong mi hngakchia chung in 10 hi Sagaing ramṭhen in an si i 9 hi Karen in a si.

Thlakhat chung ah SAC ralkap kut in hliam a tuar mi minung 37 an um i cu chung ah Sagaing ramṭhen in 25 an si tiah NUG nih a ṭial.SAC nih January thla chung ah phungning lo in a tlaih mi 95 leng an um i cu chung ah Magway ramṭhen in 25 an tlaih hna.Thlakhat chung ah mipi inn 5,079 an khangh i cu chung ah Sagaing ramṭhen ah 4,775 a kaang i Magway ramṭhen ah 211 leng a kaang tiah NUG nih a thanh.

Thawngpang dang. SAC Kuttang Kyiayan Pyithusit Nih An Tlaihmi Hna Ta’ang Miphun 127 Cu TNLA Nih An Chanhchuah Hna.Shan ramkulh chung ah a ummi SAC kuttang Kyiayan Pyithusit phu nih, ralkap ca ah an tlaihmi hna Ta’ang miphun ngakchia telh in minung 127 cu kan chanhchuah khawh cang hna, tiah TNLA nih cathanh an chuah.

February ni 4 zing sml 4:00AM hrawng ah Kyiayan Pyithusit phu nih Ta’ang miphun pa kum 8 in 17 kar minung 20, kum 18 in 65 kar 107 le nu 15 cu SAC kuttang Kyiayan Pyithusit sakhan ah an chiah hna i, TNLA Brigade 7 in ralkap 500 leng nih an va doh hna i kan chanhchuah hna, tiah an langhter.

Ta’ang miphun ngakchia tete cu Kyiayan Pyithusit phu nih hramhram in ralkap ca ah an tlaihnak hna a sau ngai cang. A luancia thla lio zong ah kum 9 tluk siangniamrun a cawng liomi ngakchia pakhat zong an rak tlaih, tiah theih a si.TNLA nih Ta’ang miphun 127 kan va khamh hna lioah SAC Jet Fighter nih, bomb lung 30 nak tlawm lo a thlak. Kyiayan khua pawng zong ah hriamngan le hriamhme he kahdohnak an tuah, tiah TNLA nih an langhter.