TNLA NIH THAWNGPANG THATUK AN VUN THANH CANG

SAC Kuttang Kyiayan Pyithusit Nih An Tlaihmi Hna Ta’ang Miphun 127 Cu TNLA Nih An Chanhchuah Hna.Shan ramkulh chung ah a ummi SAC kuttang Kyiayan Pyithusit phu nih, ralkap ca ah an tlaihmi hna Ta’ang miphun ngakchia telh in minung 127 cu kan chanhchuah khawh cang hna, tiah TNLA nih cathanh an chuah.

February ni 4 zing sml 4:00AM hrawng ah Kyiayan Pyithusit phu nih Ta’ang miphun pa kum 8 in 17 kar minung 20, kum 18 in 65 kar 107 le nu 15 cu SAC kuttang Kyiayan Pyithusit sakhan ah an chiah hna i, TNLA Brigade 7 in ralkap 500 leng nih an va doh hna i kan chanhchuah hna, tiah an langhter.

Ta’ang miphun ngakchia tete cu Kyiayan Pyithusit phu nih hramhram in ralkap ca ah an tlaihnak hna a sau ngai cang. A luancia thla lio zong ah kum 9 tluk siangniamrun a cawng liomi ngakchia pakhat zong an rak tlaih, tiah theih a si.TNLA nih Ta’ang miphun 127 kan va khamh hna lioah SAC Jet Fighter nih, bomb lung 30 nak tlawm lo a thlak. Kyiayan khua pawng zong ah hriamngan le hriamhme he kahdohnak an tuah, tiah TNLA nih an langhter.TCP

Thawngpang dang.Kalaymyo GTC Pawng Kahdohnak Le Min Khua Ah Umhmun Khuarmi SAC Ralkap Kahdohnak Ah 10 An Thi.Sagaing ramṭhen, Kalaymyo GTC sianginn pawng ah February ni 6 zinglei ah rallam a sialmi SAC ralkap cu, bomb in kan puahhnawh hna caah 5 an thi, tiah Kalay khuachung ah a cawlcangmi hriamtlai phu sin in theih a si.

February ni 6 zinglei sml 6:30AM hrawng ah Kalaymyo thlanglei gate in SAC ralkap 100 cu, ke in rallam an sial i GTC sianginn ah umhmun a khuarmi ralkap he rian i thlen ding in an kal lioah bomb in puahhnawh an ton hi a si, tiah theih a si.Rallam a sialmi ralkap cu a voikhatnak ah Chinsaing thlanglei ah bomb lung 2 in kan puahhnawh hna.

Cu hnu tlawmpal ah kan puahhnawh chap hna i SAC ralkap 5 an thi,” tiah Kalaymyo khuachung ah a cawlcang mi hriamtlai hna sinin theih a si.SAC ralkap bomb puahhnawhtu hi Kalay peng Pah Kah Phah kuttang khuachung ah a cawlcangmi an si, tiah theih a si.

Cu ṭhiamṭhiam in Magway ramṭhen, Yesagyo peng Min khua ah umhmun a khuarmi SAC ralkap pawl cu Drone in bomb thlakhnawh an ton caah 5 an thi, tiah theih a si.February ni 1 zing sml 11:00AM hrawng ah Yesagyo peng Min khua ah umhmun khuarmi SAC ralkap cu Drone in bomb kan thlakhnawh hna caah SAC ralkap 2 le pyusawhti 3 an thi, tiah Local Guerrilla phu in ṭuanvo ngeitu nih a chim.

Cu kahdohnak ah Sagaing pengkomh Battalion 4, Local Guerrilla, CDSOM -001, Pakokko Battalion 10, Companny 3 PHOENIX Special Guerrilla-Yesagyo, SSTS, KPDF-2 le PDF Brothers phu hna i bawm in an kah hna, tiah theih a si.