KNU NIH RALHRANG HMAICHIA IN LEHNAK AN TUAH HNA

KNLA|KNDO Le PDF Chimhhrinpiak Ding In SAC Nih KNU Chairman Le Ralbawizik Ca An Kuat Hna Nain A Dongh Tiang Doh Ding In Biachahnak An Ngei Cang. KNLA|KNDO le PDF chimhhrinpiak ding in SAC nih KNU Chariman le ralbawizik sin ah ca an kuat hna nain KNU Central Committee nih nanmah SAC a hram in bongh ding in biachahnak kan tuah cang, tiah KNU Central Committee chungtel P’doh Saw Taw Nee nih a chim.

February ni 6 ah SAC nih KNU Chairman Genreal Saw Mu Toe Se Phu le KNU ralbawizik Genreal Saw Kyaw Ni sin ah ca an kuat hna. An cakuat chung ah nannih KNU cu NCA minsen a thu cangmi nan si. Cu ruang ah nan kuttang KNLA|KNDO le PDF hna hi ṭha tein nan chimhhrin hna ding a si, tiah ca an kuat hna.

KNU Central Committee chungtel P’doh Saw Taw Nee nih cun, KNU nih hramhram uknak a dongh tiang kan doh lai tiin biachahnak kan tuah cang. SAC nih ca an kan kuatmi hi ṭhathnemnak le santlaihnak a ngei lo, tiah a chim.KNU Chairman le ralbawi zik hnatlaknak le nawlngeihnak lawng nih zei thil hmanh tuah khawh a si lo.

KNU ah Chairman le ralbawizik cu a lu bik an si ko nain mah nawl in thil tuah khawh a si lo. Cu bantukin SAC nih ca an kan kuatmi zong hi anmah nawl in thil tuah khawhmi a si lo. Central nih SAC ralkap cu a hram in bongh ding le doh ding in biachahnak rak tuahmi a si cang,” tiah P’doh Saw Taw Nee nih a chim.

SAC nih hi bantukin KNU Chairman le ralbawizik ca an kuatmi hna hi Karen rammi hna ṭhen cheuter an kan duhmi le an timhmi a si. A voikhatnak zong a si lo i a hlanpi in an rak hman lengmangmi an ngian a si, tiah a chim chap.Ṭhatlonak le sualnak a tuahtu hi ahodah a si ti cu mit in hmuh khawh a si ko.

Phungki sianginn, Khrihfa biakinn le cacawnnak sianginn bomb in a thlatu cu ahodah a si. Ramkomh kawlram chung ah inn 40,000 leng an khangh cang. Ramchung mi a thong leng an thah cang hna, tiah KNU chimphuannak nawlngeitu P’doh Saw Taw Nee nih cun a chim. TCP

Adang.Myanmar Cu ASEAN Chungtel Sinak In Hlawt Ding In Malaysia Prime Minister Nih A Chim.SAC nih nawlngeihnak an laak hnu in Myanmar ramchung ah buaibainak a chuakmi nih, ASEAN ca ah hnahnawhnak a chuahter ruang ah Myanmar ram cu ASEAN chungtel sinak in chuah ding in Malaysia Prime Minister Anwar Ibrahim nih a chim, tiah theih a si.

Malaysia Prime Minister cu Thailand ram a tlawn lioah Thailand Prime Minister he tonnak an ngei i cu lioah atu bantukin a chim hi a si.Myanmar ram buaibainak kong ah ASEAN kan cawlcangh ning a hnursuan awk a si lo. Myanmar ralkap lehrulhnak ca ah ASEAN nih biafunnak kan tuah awk a si,” tiah Malaysia Prime Minister nih cun a chim.

Ram pakhat nih a ramchung ah a tuah awk ding rian a policy cu a um hrimhrim awk a si. Asinain atu lio vawleicung boruak hoih in ram pakhat nih a rammi hna cung ah hremnak, hrocernak le thahnawnnak tuahnak nawl a ngei lo, tiah a chim chap.Cu pin ah Malaysia Prime Minister nih, Thailand Prime Minister cu Myanmar ram buainak kong ah Thailand nih fak piin nan i zuam a hau tiah forhfialnak a tuah, tiah theih a si.