THANTLANG KHUA A KHAANGTU RALBAWI PAHNIH THEIH AN SI CANG

SAC Ralbawi Saw Ye Moe Aung Le Hein Myat Soe Nih Thantlang An Khangh Tiah Tlaih A Tongmi Palik Nih An Chim.Chin ramkulh, Thantlang khua a khangtu cu SAC ralbawi Captain Saw Ye Moe Aung le Captain Hein Myat Soe le an kuttang ralkap an si, tiah Thantlang CB Bank ah tlaih a tongmi palik nih an chim.

Captain Saw Ye Moe Aung cu Thantlang SAC ralkap sakhan ah a ummi a si. Thantlang khuachung ah kahdohnak a tuahtu hi amah a si. Atu cu Thantlang ah a um ti lo.Khuachung an kal fate inn an khangh. Cucu kannih nih zeihmanh kan thei lo. An khangh hnu lawng in meikhu kan hmuh i, cu lawng ah an kan khangh kan theih.

Saw Ye Moe Aung amin hi Karen min a si, tiah tlaih a tongmi palik nih an chim.Cu pin ah Capatain Hein Myat Soe le a kuttang ralkap pawl zong nih Thantlang inn an khangh ve. Anih hi kanmah palik sakhan umnak ah a um vemi a si, tiah an chim.

Captain Hein Myat Soe le Saw Ye Moe Aung Thantlang khua an khangh lawng si loin khuami an thilri mansung vialte zong an firpiak hna. An put khawh lo ahcun an rak kan auh i kan va putpi hna, tiah tlaih a tongmi palik nih cun an chim.Inn 2,000 leng a umnak Thantlang khua cu a luancia 2022 September 9 thawk in SAC ralkap nih voi 15 nak tlawm lo an rak khangh i, khua ning piin a ciam tluk a si cang, tiah theih a si. Credit: TCP

Cabia dang.SAC cung ah ramdang nih phihkharnak an tuah mi CNF nih an lunglawmhnak an langhter. Hramhram in uknak a latu SAC cung ah ni tlaklei ram hna nih phihkharnak an tuah mi cung ah kan i lawm tiah CNF nih an thanh.American, Britain, Canada le Australia hna nih SAC cung ah phihkharnak an tuah hi mipi pawl a hremnak le kahdohnak chung ah dawnkhantu nganpi a si ter lai tiah CNF nih an chim.

A hlei khun in, Canada le Britain nih SAC caah vanlawng datsi/diesel an phorhnak kha phihkharnak a tuah caah kan i lawm tiah CNF nih a chim. Vanlawng Datsi/Diesel an lak khawh nak lam a um chung cu SAC nih mipi umnak hmunhma ah ral le ral lo thleidang lo in a doh ko lai tiah an langhter.

Cun SAC nih a tuah mi kahdohnak, mipi umnak zong hrial lo in vanlei kahdohnak a tuah mi zong CNF nih an doh. A hlei in a luancia December 21 ah UN nih Myanmar kong he pehtlai in hnatlaknak an ngeih mi hramhram in kahdohnak pawl dirter seh timi kha SAC nih an buar hramhram caah kan cohlang lo tiah an thanh.

Cun ASEAN Chairmanship a si mi Indonesia nih Myanmar ram mipi hna caah bawmhnak pawl khenkhamnak um lo tein pek khawh nak hnga an i zuam mi zong CNF nih kan lung aa lawm tiah cathanh ah an ṭial.

Cun, vawlei cung ram hna nih Myanmar ramchung buainak pawl zong ṭha tein kan ngiatpiak uh tiah CNF nih a hal.Cun, phung he aa kalh mi uk caan sauh mi chung ah Chin ramkulh leng in Myanmar ram buainak hi karhter chin aa tim tiah CNF nih ralrinnak a thanh.