CDM A TUAH LOMI FALAM PAWL CAAH TTIHNUNG TAKTAK SI CANG

CDM A Tuah Lomi Paoh Hmalaaknak Kan Tuah Cang Lai Tiah CNO/CNDF Nih Thanh. CNO/CNDF hmunhma chung a um i SAC kuttang ah rianṭuantu hna nih CDM tuah ding in voi tampi ca chuahnak le therhternak pek nan si cang.

CDM cawlcanghnak ah aa tel lomi Non-CDM hna cu hmalaaknak tuah ding in CEC Meeting (2/23) ah biachahnak tuah a si cang. Cucaah SAC kuttang rianṭuanmi hna nih February thla a dih hlan ah CNO/CNDF hmunhma chung ah um ti lo ding in CNO/CNDF nih ralrin peknak cathanh a chuah.

Thawngpang dang. Matupi Peng Ni 6 Chung Ah Kahdohnak Voi 15 A Chuak, SAC Ralkap 40 An Thi. Chin ramkulh, Matupi peng chung ah SAC ralkap le Chin hriamtlai phu kar February thla ni 6 chung ah kahdohnak voi 15 a chuak. Cu kahdohnak ah cun SAC ralkap 40 an thi, 20 leng nih hliamhma an tuar tiah CDF-Zotung nih cathanh an chuah.

Cathanh an chuahmi chung ah cun 2023, February thla chung Chin ramkulh Zotung hmunhma ah rallam sialtu SAC ralkap minung thazaang 150 hrawng le Chinland Defence Force -Zotung, Chinland Defence Force – Zophei, Chinland Defence Force – Lautu, Chinland Defence Force – Mara, Chinland Defence Force – Senthang le CNA kar ni 6 chung ah fak ngaiin kahdohnak voi 15 a chuak.

Kaphnih kar i kahdohnak ah SAC ralkap 40 nak tam an thi i minung 20 leng nih hliamhma an tuar. Chinland Defence Force -Zotung chungtel 2 le CNA 1 tiin minung 3 nih ram le miphun ca ah an nunnak an pek.Ram le miphun ca ah nunnak a liammi mipi ralkap 3 hna nih an taantakmi chungkhar hna nan ngaihchiatnak kan in hrawmpi hna. Nunnak liammi mipi ralkap a sang bik upatnak kan in pek hna tiah Chinland Defence Force – Zotung nih cathanh an chuah.